Protestat kundër kryeministrit Edi Rama në Shqipëri kanë hyrë në ditën e 21-të, me mijëra qytetarë që marshojnë çdo natë në rrugët e Tiranës duke kërkuar dorëheqjen e tij. Pas protestës së djeshme, ku marshimi zgjati mbi dy orë dhe përfundoi në sheshin “Skënderbej”, sot tubimi pritet të jetë edhe më i madh. Në këtë protestë i janë bashkuar edhe emigrantët nga diaspora, të cilët kanë mbërritur në kryeqytet me automjete të mbuluara me flamuj kuqezi, duke sjellë një dimension mbarëkombëtar në revoltën kundër qeverisë. Protestuesit mbajnë pankarta me mesazhe kundër klasës politike dhe vazhdojnë të kërkojnë largimin e Ramës, duke shprehur pakënaqësinë që nisi në Zvërnec dhe u përhap në të gjithë vendin.