Protesta qytetare kundër qeverisë dhe kryeministrit Edi Rama ka arritur ditën e saj të 78-të, me një pjesëmarrje të lartë qytetarësh dhe bashkatdhetarësh nga diaspora që i janë bashkuar masivisht për të tretën ditë me radhë në Tiranë. Emigrantët shqiptarë, të cilët kanë zgjedhur të aktivizohen gjatë pushimeve verore, kërkojnë që Shqipëria të ofrojë kushte ekonomike dhe sociale që të ndalojë largimin e rinisë dhe familjeve drejt vendeve evropiane. Gjatë tubimit të ditës së sotme në sheshin “Skënderbej” dhe marshimit në Bulevardin “Dëshmorët e Kombit”, u shënua një situatë tensioni mes dy grupeve të protestuesve, por ndërhyrja e disa pjesëmarrësve shmangu përshkallëzimin e dhunës. Organizatorët vazhdojnë thirrjet për rritje të pjesëmarrjes dhe theksojnë se rezistenca do të vazhdojë deri në dorëheqjen e kryeministrit dhe qeverisë aktuale.