Ministrja e Punëve të Jashtme dhe Diasporës, Donika Gërvalla-Schwarz, mori pjesë në një drekë lamtumirëse të organizuar nga Ambasada Gjermane në Kosovë, me rastin e përfundimit të mandatit të Shefit të Zyrës së Bashkimit Evropian në Kosovë, Aivo Orav. Gërvalla e cilësoi Orav si një mik të çmuar të Kosovës dhe vlerësoi kontributin e tij të rëndësishëm në afrimin e Kosovës me Bashkimin Evropian, duke theksuar mbështetjen e tij në reforma kyçe, sidomos në forcimin e sundimit të ligjit dhe avancimin e agjendës evropiane të vendit. Ajo theksoi njohjen e thellë të Orav për realitetin kosovar dhe trajtimin e vendit si një partner serioz, si dhe bashkëpunimin e ngushtë dhe dialogun e hapur gjatë kohës që ajo ka qenë ministre. Në përfundim, Gërvalla i uroi suksese ambasadorit në angazhimet e ardhshme dhe e falënderoi për profesionalizmin, integritetin dhe përkushtimin e tij ndaj Kosovës.