Zëvendëskryeministrja dhe ministrja e Drejtësisë, Donika Gërvalla, vizitoi Zyrën Rajonale të Shërbimit Sprovues në Gjilan, ku vlerësoi këtë institucion si një hallkë kyçe për mbikëqyrjen dhe zbatimin e masave alternative ndaj dënimit me burgim. Ajo theksoi se një sistem drejtësie efektiv matet nga aftësia për të garantuar zbatimin e ligjit dhe përfshirjen aktive të personave nën mbikëqyrje në shoqëri. Ministrja nënvizoi prioritetin e forcimit të Shërbimit Sprovues përmes rritjes së efikasitetit profesional, trajnimeve për stafin dhe krijimit të kushteve për zbatim efektiv të masave. Gjithashtu, Gërvalla premtoi vazhdimin e angazhimit për modernizimin e infrastrukturës dhe thellimin e bashkëpunimit ndërinstitucional me gjykatat, prokurorinë dhe institucionet korrektuese, si parakusht për një sistem drejtësie që i shërben qytetarëve në mënyrë të drejtpërdrejtë.