Kuvendi i Komunës së Drenasit mbajti një seancë të jashtëzakonshme për të diskutuar krizën e furnizimit me ujë të pijshëm, e cila ka rënduar ndjeshëm dhe ka sjellë ndërprerje të shpeshta dhe të zgjatura për banorët. Kryetari Ramiz Lladrovci theksoi se situata është e papranueshme dhe se Drenasi po përballet me diskriminim në këtë aspekt, pavarësisht investimeve prej rreth 3 milionë eurosh në rrjetin e ujësjellësit dhe kapacitete alternative. Ai kërkoi nga KRU “Prishtina” dhe Ministria e Mjedisit që të trajtojnë me prioritet këtë problem dhe paralajmëroi se Komuna do t’u drejtohet organeve të drejtësisë për mosveprim dhe moskryerje të përgjegjësive nga institucionet përgjegjëse. Asambleistët e Kuvendit Komunal shprehën shqetësim për pasojat e mungesës së ujit dhe kërkuan ndërhyrje të menjëhershme për sigurimin e furnizimit të rregullt.