Kryetari i Komunës së Drenasit, Ramiz Lladrovci, ka ngritur shqetësimin për mungesën e ujit të pijshëm që po përballet kjo komunë, duke theksuar se situata ka kaluar çdo kufi të durimit dhe se qytetarët po diskriminohen në këtë aspekt jetik. Ai ka theksuar se Komuna ka investuar miliona euro në infrastrukturën e ujësjellësit, por problemet vazhdojnë për shkak të amortizimit të pompave në Bivolak, të cilat janë nën kompetencën e nivelit qendror dhe KRU “Prishtina”. Lladrovci ka kritikuar ashpër KRU-në për mosmenaxhim dhe mungesë bashkëpunimi, duke paralajmëruar se do të kërkojnë drejtësi për mosangazhimin e saj në furnizimin me ujë. Gjendja e rëndë e mungesës së ujit po ndikon edhe në sektorin ekonomik dhe shëndetësor të komunës, ndërsa qytetarët kanë paralajmëruar protesta, të cilat sipas kryetarit nuk janë zgjidhje, por do të ndiqen hapa ligjorë për të adresuar këtë krizë.