Ish-ministri i Infrastrukturës, Hysen Durmishi, ka reaguar ashpër ndaj Shkëlzen Gashit, duke e akuzuar për deformim të historisë së Ushtrisë Çlirimtare të Kosovës. Ai ka rikujtuar një përplasje të vitit 2005, kur sipas tij e kishte përjashtuar personalisht Gashin nga Lëvizja Vetëvendosje për shkak të tendencës së tij për të deformuar luftën e drejtë të UÇK-së. Durmishi ka kritikuar gjithashtu institucionet që lejojnë dhe financojnë aktivitete që përçojnë këto narrativa, duke i cilësuar si të papranueshme dhe si një fyerje të rëndë për sakrificën e dëshmorëve të luftës. Ai ka theksuar se deformimet e historisë janë një “vrasje e dytë” për ata që dhanë jetën për liri dhe çlirim.