Organizata AVONET ka kërkuar anulimin e një procedure prokurimi të Ministrisë së Kulturës dhe Turizmit, që parashikon angazhimin e 26 personave përmes Marrëveshjeve për Shërbime të Veçanta me vlerë prej 743 mijë eurosh. AVONET vlerëson se përdorimi i këtyre marrëveshjeve për detyra të përhershme institucionale është në kundërshtim me legjislacionin për prokurimin publik, pasi ato duhet të përdoren vetëm për ekspertizë specifike dhe shërbime të përkohshme. Organizata thekson se pozitat e parashikuara, si arkitektë, inxhinierë dhe specialistë të ndryshëm, kanë karakter të vazhdueshëm dhe nuk justifikojnë përdorimin e kontratave mbi vepër. AVONET kërkon që nevojat për personel të plotësohen përmes procedurave të rregullta të rekrutimit dhe fton organet kompetente të hetojnë ligjshmërinë e tenderit dhe të përcaktojnë përgjegjësinë e zyrtarëve përkatës.