Valon Murseli, asamblist i PDK-së në Kuvendin Komunal të Fushë Kosovës, ka ngritur shqetësime serioze lidhur me procesin e shpalljes së përfituesve të bursave studentore nga kjo komunë. Ai ka kritikuar mungesën e transparencës në publikimin e listës së përfituesve, duke theksuar se ajo nuk përmban elemente zyrtare, si numër protokolli, emrat e anëtarëve të komisionit vlerësues apo pikët e fituara nga studentët. Murseli ka vënë në dukje se lista e publikuar nuk përfshin as studentët që nuk kanë përfituar, duke penguar kështu krahasimin dhe besueshmërinë e procesit. Ai ka kërkuar që Auditori i Brendshëm i Komunës të shqyrtojë tërësisht këtë çështje dhe ka ftuar studentët që ndihen të dëmtuar të kontaktojnë për të rivlerësuar procesin dhe përfituesit sipas kritereve të shpallura.