Federata Evropiane e Gazetarëve (EFJ) ka miratuar në mënyrë unanime një mocion në Kongresin e saj vjetor në Ankara, duke shprehur mbështetje për mediat në Kosovë që janë ndëshkuar me gjoba nga Komisioni i Pavarur i Mediave (KPM). EFJ-ja vlerëson se këto gjoba janë joproporcionale dhe janë pasojë e presioneve nga anëtarë të partisë në pushtet, Lëvizjes Vetëvendosje, duke kërcënuar kështu lirinë e shprehjes dhe pluralizmin mediatik në vend. Organizata evropiane i ka kërkuar Vetëvendosjes të ndalë sulmet ndaj gazetarëve dhe mediave, si dhe ka kërkuar nga KPM-ja që të mos tejkalojë kompetencat e saj ligjore. Për më tepër, EFJ-ja ka paralajmëruar se vendimet e KPM-së mund të çojnë në vetëcensurë dhe dobësim të debatit publik, duke rrezikuar rëndë pavarësinë editoriale dhe funksionimin demokratik të medias në Kosovë.