Emisari i Bashkimit Evropian për dialogun Kosovë-Serbi, Peter Sorensen, është duke zhvilluar takime intensive me liderët e të dyja vendeve për të avancuar procesin e dialogut. Pas një vizite në Beograd ku u takua me presidentin serb Aleksander Vuçiq dhe kryenegociatorin Petar Petkoviç, Sorensen pritet të vijë sot në Prishtinë për të vazhduar bisedimet. Në takimin e fundit me Vuçiqin, ata ranë dakord për nevojën e angazhimit të përbashkët për përfitime konkrete dhe avancimin e çështjeve kryesore, përfshirë zbatimin e Ligjit për të Huajt. Më 14 mars në Prishtinë, pas takimit me kryeministrin Albin Kurti, u arrit marrëveshja për zbatimin e modifikuar të Ligjit për të Huajt, duke përfshirë masa shtesë si dhënien e lejeve për punëtorët arsimorë, shëndetësorë dhe studentët serbë për një periudhë fillestare 12-mujore.