Ambasadori i Kosovës në Gjermani, Faruk Ajeti, ka njoftuar se platforma globale e udhëtimeve Expedia ka bërë një ndryshim të rëndësishëm duke njohur Kosovën si shtet të pavarur në faqen e saj. Përveç kësaj, emri i kryeqytetit të Kosovës është korrigjuar nga forma e mëparshme e gabuar “Priština” në “Prishtina”. Ky sukses është arritur falë angazhimit të ekipit diplomatik të Kosovës, i cili ka punuar për të siguruar njohjen dhe prezantimin e saktë të vendit në platforma me miliona përdorues në mbarë botën. Expedia, së bashku me platformat e saj si Hotels.com dhe Vrbo, tani paraqesin Kosovën dhe kryeqytetin e saj në mënyrë të saktë, duke rritur kështu prezencën dhe njohjen ndërkombëtare të vendit.