Ministri për Evropën dhe Punët e Jashtme, Ferit Hoxha, priti në Tiranë drejtuesit dhe përfaqësuesit shqiptarë nga Lugina e Preshevës, duke përfshirë deputetin Shaip Kamberi, kryetaren e Preshevës Ardita Sinani, kryetarin e Bujanocit Arbër Pajaziti dhe kryetarin e Këshillit Kombëtar Shqiptar Enkel Rexhepi. Gjatë takimit u zhvillua një bisedë e hapur dhe vëllazërore për çështjet kyçe që lidhen me mbrojtjen e të drejtave të shqiptarëve, ruajtjen e identitetit kombëtar dhe forcimin e përfaqësimit të tyre me fuqi reale në institucionet e Serbisë. Ministri Hoxha theksoi se përfaqësimi i denjë, zhvillimi ekonomik, arsimi dhe mundësitë për të rinjtë janë prioritet i vazhdueshëm dhe kërkojnë bashkëpunim dhe veprim konkret. Ai gjithashtu nënvizoi angazhimin e Shqipërisë për të qëndruar pranë shqiptarëve të Luginës së Preshevës me dialog dhe mbështetje konkrete, duke e cilësuar këtë si një nga përparësitë e qëndrueshme të politikës së jashtme shqiptare.