Ministri për Evropën dhe Punët e Jashtme i Shqipërisë, Ferit Hoxha, zhvilloi një takim me deputetin shqiptar në Parlamentin e Serbisë, Shaip Kamberi, dhe kryetarin e Këshillit Kombëtar të Shqiptarëve në Luginën e Preshevës, Enkel Rexhepi. Hoxha vlerësoi rolin e Kamberit si një zë i fortë i shqiptarëve në Serbi dhe theksoi angazhimin e përbashkët për adresimin e çështjeve që prekin komunitetin shqiptar në Luginën e Preshevës, përfshirë edhe në forume ndërkombëtare. Ministri nënvizoi vëmendjen e veçantë të qeverisë shqiptare për mbrojtjen dhe avancimin e të drejtave të shqiptarëve në Serbi, duke theksuar rëndësinë e respektimit të identitetit kombëtar, gjuhës, kulturës dhe zhvillimit ekonomik të tyre. Ai premtoi vazhdimin e bashkëpunimit të ngushtë me përfaqësuesit zyrtarë shqiptarë dhe partnerët ndërkombëtarë për të garantuar dinjitetin, barazinë dhe zhvillimin e komunitetit shqiptar në tri komunat e Luginës së Preshevës.