Deputeti i Partisë Demokratike të Kosovës, Artan Behrami, ka mbrojtur protestën e fermerëve të qumështit në Kosovë, duke e cilësuar si një veprim të drejtë dhe të ngjashëm me ato që janë parë në vende të ndryshme evropiane. Ai ka theksuar se fermerët evropianë kanë përdorur metoda të ngjashme, duke derdhur qumësht në ara, pranë ndërtesave qeveritare dhe madje edhe në lumenj, si një formë proteste ndaj politikave dhe çmimeve të padrejta. Behrami ka përmendur një rast të vitit 2009, kur fermerë nga Gjermania dhe Franca derdhën qumësht në lumin Rhein, duke treguar se këto forma proteste kanë një traditë të gjatë në Evropë. Ai ka bërë thirrje që protesta e fermerëve kosovarë të mos paragjykohen, duke theksuar se ato janë pjesë e një lëvizjeje më të gjerë evropiane për drejtësi në sektorin e qumështit.