Fermerët e qumështit kanë protestuar para Ministrisë së Bujqësisë, duke kërkuar zgjidhje urgjente për krizën që i ka prekur pas mbylljes së përkohshme të qumështores “Vita” dhe ndalimit të grumbullimit të qumështit për katër ditë. Ata paralajmërojnë rrezikun e falimentimit dhe kanë shprehur pakënaqësi të thellë për situatën e krijuar, duke ndërmarrë edhe veprime ekstreme si derdhja e qumështit në rrugë dhe lumenj. Ish-kryetari i Aleancës, Ramush Haradinaj, ka akuzuar Qeverinë në detyrë për një qasje armiqësore ndaj prodhuesve vendorë, duke theksuar se kjo po dëmton drejtpërdrejt fermerët, familjet e tyre dhe ekonominë e vendit. Ai ka bërë thirrje për ndërhyrje urgjente nga institucionet, kërkon dëgjimin e kërkesave të fermerëve dhe kompensimin e dëmeve, duke i konsideruar ata partnerë të rëndësishëm në zhvillimin ekonomik.