Kryetari i Komunës së Drenasit, Ramiz Lladrovci, ka uruar me ngrohtësi nxënësit, mësuesit, arsimtarët, profesorët dhe prindërit me rastin e fillimit të vitit të ri shkollor. Ai ka theksuar rëndësinë e përkushtimit të përbashkët për një proces mësimdhënieje dhe mësimnxënieje cilësore, duke shprehur dëshirën që ky vit të jetë i mbushur me suksese dhe arritje. Në ditën e parë të shkollës, Lladrovci ka vizituar nxënësit e klasës së parë në Shkollën Fillore dhe të Mesme të Ulët “Gani Sylaj”, ku ka përgëzuar nxënësit e rinj, mësuesit dhe drejtorin Demaku për fillimin e vitit shkollor. Ai e ka cilësuar këtë ditë si një moment të paharrueshëm dhe ka nënvizuar nevojën për angazhim të përbashkët të komunitetit arsimor dhe prindërve për të arritur rezultate të larta gjatë vitit shkollor.