Kryeprokurori i Shtetit, Zejnulla Gashi, priti në takim drejtorin e Administratës Tatimore të Kosovës, Mentor Hyseni, ku u diskutua thellimi i bashkëpunimit ndërinstitucional. Qëllimi kryesor i këtij bashkëpunimi është trajtimi efikas i çështjeve të përbashkëta në luftën kundër pastrimit të parave, evazionit fiskal dhe formave të tjera të kriminalitetit financiar. Në takim u theksua nevoja për zbatim më proaktiv të memorandumit të bashkëpunimit që rregullon shkëmbimin e informacionit për hetime penale mbi të dhënat inteligjente. Kjo nismë pritet të forcojë sundimin e ligjit në Kosovë dhe të përmirësojë luftën kundër korrupsionit dhe krimit të organizuar.