Kryesuesi i Këshillit Prokurorial të Kosovës, Arian Gashi, priti në takim Avokatin e Popullit, Naim Qelaj, për të diskutuar bashkëpunimin ndërinstitucional në mbrojtjen dhe respektimin e të drejtave dhe lirive themelore të njeriut në kuadër të procedurave penale. Takimi u zhvillua me pjesëmarrjen e anëtarëve dhe zyrtarëve të të dy institucioneve, ku u theksua rëndësia e komunikimit të rregullt, shkëmbimit të përvojave dhe koordinimit për të garantuar sundimin e ligjit dhe besimin e publikut në sistemin e drejtësisë. Gashi nënvizoi nevojën për zbatimin e standardeve kushtetuese dhe ndërkombëtare në të gjitha fazat e procedurave penale, ndërsa Qelaj shprehu gatishmërinë për avancimin e bashkëpunimit institucional dhe forcimin e mekanizmave për mbrojtjen e të drejtave të njeriut. Në përfundim, palët ranë dakord për vazhdimin e komunikimit dhe bashkëpunimit të ndërsjellë me qëllim avancimin e sundimit të ligjit dhe konsolidimin e besimit të qytetarëve në drejtësi.