Zëvendësministri italian i Punëve të Jashtme, Edmondo Cirielli, së bashku me ministrin në detyrë të Shëndetësisë së Kosovës, Arben Vitia, vizituan Laboratorin e Mikrobiologjisë në Klinikën Infektive të Qendrës Klinike Universitare të Kosovës. Ky laborator është themeluar falë bashkëpunimit ndërmjet Kosovës dhe Italisë dhe mbështetjes së Kooperacionit Italian për Zhvillim, përmes projektit “Mbështetje për Sistemin Shëndetësor të Kosovës”. Vizita shërbeu si një shenjë vlerësimi për bashkëpunimin e ngushtë mes dy vendeve në forcimin e kapaciteteve të sistemit shëndetësor, veçanërisht në fushën e diagnostikimit laboratorik dhe mikrobiologjisë. Ky bashkëpunim tregon përkushtimin e përbashkët për avancimin e shëndetit publik në Kosovë dhe thellimin e marrëdhënieve ndërkombëtare.