Procesi i formimit të Qeverisë së Legjislaturës së X-të në Kosovë u karakterizua nga mungesa e transparencës dhe një debat shumë i kufizuar parlamentar. Deputetët dhe opinioni publik nuk morën informacion paraprak për përbërjen e kabinetit dhe zgjerimin e ministrive, i cili u bë pa analiza funksionale, financiare apo administrative. Në vend të një programi të plotë qeverisës, Kuvendi u përball vetëm me një ekspoze të shkurtër, duke kufizuar mundësinë për debat dhe llogaridhënie në një moment kyç për vendin. Opozita, nga ana e saj, shfaqi aktivitet minimal gjatë seancës së votimit, duke mos trajtuar çështje të rëndësishme që ndikojnë drejtpërdrejt në jetën e qytetarëve.