Në Prishtinë u mbajt Forumi Rajonal i Mbrojtësve të të Drejtave të Njeriut, ku u diskutuan sfidat e shumta me të cilat përballen aktivistët dhe nevoja për një mbrojtje më të fuqishme në Kosovë dhe rajon. Drejtoresha e YIHR Kosovë, Marigona Sadriu, theksoi kërcënimet dhe presionet që përjetojnë mbrojtësit e të drejtave të njeriut, duke kërkuar krijimin e një mjedisi më të sigurt për ta. Zëvendësavokati i Popullit, Niman Hajdari, nënvizoi rolin kyç të tyre në forcimin e demokracisë dhe nevojën për mbështetje institucionale dhe shoqërore. Përfaqësuesi i UNMIK-ut, Peter N. Due, theksoi rëndësinë e integrimit të standardeve ndërkombëtare në legjislacionin vendor dhe mbështetjen e vazhdueshme për aktivistët, duke theksuar sfidat e vazhdueshme si kërcënimet, stigmatizimin dhe ngushtimin e hapësirës qytetare.