Ministri i Mbrojtjes së Kosovës, Ejup Maqedonci, njoftoi se gjatë katër viteve të fundit janë investuar mbi 450 milionë euro në Forcën e Sigurisë së Kosovës (FSK), duke e bërë atë një nga ushtritë më të forta në Ballkanin Perëndimor, përveç Serbisë. Ai theksoi se FSK-ja është pajisur me sisteme moderne artilerie, përfshirë artilerinë amerikane 105 mm “Hawkeye”, tri sisteme antitank dhe dronë të avancuar si Bayraktar TB2 dhe Puma, ndërsa është në proces blerjeje të helikopterëve multifunksionalë. Ministri gjithashtu përmendi zhvillimin e infrastrukturës ushtarake, trajnime brenda dhe jashtë vendit, si dhe krijimin e një programi mbrojtjeje gjithëpërfshirëse me rezervë vullnetare, ku çdo qytetar mund të regjistrohet si vullnetar. Ai shtoi edhe bashkëpunimin me Shqipërinë dhe Kroacinë, si dhe kërkesën për dorëzimin e grupit të Radoiçiqit pas sulmit në Banjskë.