Dymbëdhjetë pjesëtarë të Forcës së Sigurisë së Kosovës kanë përfunduar me sukses Kursin e Komunikimit – Niveli 2, duke fituar aftësi të avancuara në përdorimin e sistemeve moderne Harris. Ky trajnim i specializuar i ka pajisur kursantët me njohuri në konfigurimin, instalimin dhe funksionalizimin e sistemeve të komunikimit ushtarak, të cilat garantojnë komunikim të sigurt dhe efektiv gjatë operacioneve dhe ushtrimeve taktike. Sistemet Harris janë të përdorura gjerësisht nga forcat e armatosura të vendeve partnere, duke rritur ndërveprueshmërinë ndërkombëtare të FSK-së. Përfundimi i këtij kursi përbën një hap të rëndësishëm në forcimin e kapaciteteve profesionale dhe operacionale të Forcës së Sigurisë së Kosovës, duke siguruar mbështetje më të mirë për komandimin dhe kontrollin në të gjitha nivelet.