Kryeministri Albin Kurti ka njoftuar se në Kosovë nuk ka më terminale doganore private, pasi kontratat me kompanitë që i menaxhonin ato nuk janë vazhduar dhe terminalet e fundit tashmë janë në menaxhim publik. Në mbledhjen e Qeverisë janë marrë rreth 15 vendime, përfshirë edhe dhënien në shfrytëzim të ngastrave kadastrale për Doganën e Kosovës, me qëllim ndërtimin e një terminali publik doganor. Ky vendim u përshëndet nga kryeministri Kurti, i cili theksoi se tani të gjitha terminalet doganore janë publike. Përveç kësaj, Qeveria miratoi edhe masa të tjera, si zhvendosjen e Zyrës për çështjet e kategorive të dala nga lufta e UÇK-së në Ministrinë për Punë, Familje dhe Vlerat e Luftës Çlirimtare, si dhe themelimin e Sistemit për Zbatimin e Mbështetjes së Bashkimit Evropian përmes Instrumentit për Reforma dhe Rritje Ekonomike për Ballkanin Perëndimor.