Zëvendëskryeministrja dhe ministrja e Drejtësisë në detyrë, Donika Gërvalla, theksoi në tryezën për Ditën Ndërkombëtare të Familjes se fuqizimi i familjes është një përgjegjësi shtetërore thelbësore për stabilitetin e shoqërisë dhe mirëqenien e fëmijëve. Ajo njoftoi se gjatë periudhës 2021–2025 janë ndërmarrë reforma të rëndësishme, përfshirë dyfishimin e mbështetjes financiare për strehimoret dhe organizatat sociale, si dhe rritjen e mbështetjes për familjet strehuese dhe fëmijët pa përkujdes prindëror. Ministrja theksoi miratimin e ligjeve të reja për mbrojtjen nga dhuna në familje dhe dhuna me bazë gjinore, si dhe funksionalizimin e mekanizmave koordinues lokalë dhe programeve për trajtimin e kryerësve të dhunës. Këto masa synojnë të forcojnë mbrojtjen institucionale dhe të zgjerojnë qasjen në ndihmë juridike falas për kategoritë më të cenueshme, duke garantuar më shumë kujdes dhe shërbime për familjet dhe fëmijët në Kosovë.