Kryetari i Prishtinës, Përparim Rama, ka zhvilluar një takim me ambasadorin italian në Kosovë, Maurizio Antonini, ku diskutuan mbi fuqizimin e të rinjve dhe krijimin e mundësive të reja për zhvillim profesional. Një nga projektet kryesore të bashkëpunimit është krijimi i Inkubatorit të Bizneseve në Prishtinë, që synon të lidhë arsimin profesional me tregun e punës dhe të mbështesë inovacionin dhe aftësimin e të rinjve. Gjithashtu, u fol për avancimin e edukimit parashkollor përmes metodës “Reggio Emilia” dhe për promovimin e iniciativave kreative që nxisin mësimin inovativ dhe qëndrueshmërinë në shkolla. Përparim Rama theksoi rëndësinë e ndërtimit të partneriteteve që sjellin mundësi reale për gjeneratat e reja, duke e bërë këtë bashkëpunim një hap të rëndësishëm për zhvillimin e komunitetit të të rinjve në Prishtinë.