Koalicioni Demokracia në Veprim (DnV) ka vlerësuar se fushata për zgjedhjet e parakohshme parlamentare të 7 qershorit u zhvillua në një ambient konkurrues dhe kryesisht të qetë, pa incidente serioze. Megjithatë, organizata thekson mungesën e debateve të thella për politika konkrete dhe financueshme, si dhe dominimin e liderëve politikë dhe sloganeve elektorale mbi kandidatët individualë. DnV ka evidentuar shqetësime për pabarazi në garë, përfshirë ndikimin e vendimeve të institucioneve para fushatës, si dhe mungesën e hapësirës së barabartë për gratë në debatet televizive dhe diskursin publik. Gjithashtu, fushata u karakterizua nga tubime të mëdha elektorale dhe përdorimi i gjerë i rrjeteve sociale me shpenzime të konsiderueshme për sponsorizime, ndërsa kontaktet direkte me qytetarët dhe diskutimet për politika publike mbetën të kufizuara.