Në Ditën Botërore të Lirisë së Shtypit, situata e mediave në Kosovë mbetet shqetësuese, me rritje të kërcënimeve dhe sulmeve ndaj gazetarëve, pavarësisht përmirësimit të lehtë në renditjen ndërkombëtare. Gjatë vitit të kaluar janë regjistruar 69 raste të sulmeve dhe kërcënimeve, ndërsa vetëm në katër muajt e parë të këtij viti janë evidentuar 16 raste të tilla, duke treguar se sfidat në praktikë vazhdojnë të jenë serioze. Drejtoresha ekzekutive e Asociacionit të Gazetarëve të Kosovës, Getoarbë Mulliqi, thekson se liria e shtypit është e garantuar formalish, por presioni politik, diskursi publik përçarës dhe sulmet online, veçanërisht ndaj grave gazetare, e bëjnë ushtrimin e gazetarisë gjithnjë e më të vështirë. Ajo kërkon reagim më të fortë institucional, hetime efikase dhe mbrojtje të gazetarëve, si dhe qëndrueshmëri financiare të mediave për të siguruar një ambient më të sigurt dhe të pavarur për gazetarinë në Kosovë.