Gazetarja finlandeze Jessikka Aro ka paralajmëruar për rrezikun serioz që përbën propaganda serbo-ruse për sigurinë në Kosovë dhe rajon. Ajo ka përjetuar për më shumë se një dekadë kërcënime të vazhdueshme, përfshirë edhe me vdekje, për shkak të punës së saj në ekspozimin e rrjeteve të dezinformimit dhe “fabrikave të trollëve” që përhapin mesazhe të koordinuara nga shërbimet ruse të sigurisë. Propaganda ruse, e cila është bërë pjesë e rrjedhës kryesore të informacionit në disa media serbe, synon të rrisë tensionet e brendshme dhe të ndikojë në politikën e brendshme të vendeve të rajonit, duke përdorur metoda si sulme në rrjete sociale, gjuhë urrejtjeje dhe intimidim. Aro thekson se kundërmasat më efektive janë bllokimi i platformave propagandistike dhe, më kryesorja, ndërgjegjësimi publik për mënyrën se si funksionon propaganda dhe rreziqet që ajo sjell për stabilitetin dhe sigurinë në Ballkan.