Ligji për zgjedhjet e përgjithshme ndalon përdorimin e automjeteve zyrtare dhe të gjitha resurseve shtetërore gjatë fushatës zgjedhore për qëllime fitimi votash. Ministrat në detyrë, kryetarët e komunave dhe kandidatët që shfrytëzojnë këto burime për fushatë përballen me gjoba deri në 50 mijë euro, sipas Panelit Zgjedhor për Ankesa dhe Parashtresa. Përdorimi i stafit të administratës publike, arsimit, shëndetësisë dhe gjykatave, si dhe i ambienteve zyrtare, është gjithashtu i ndaluar për qëllime elektorale. Njohësit e çështjeve politike theksojnë se shfrytëzimi i këtyre resurseve nga Qeveria në detyrë e dëmton procesin zgjedhor, duke krijuar një garë të pabarabartë mes subjekteve politike. Vetëm Presidenti, kryeministri dhe ministri i Punëve të Jashtme mund të përdorin automjetet zyrtare pa kufizime, sipas Ligjit për Protokollin e Shtetit.