Gjykata Supreme ka ende dy ditë afat ligjor për të vendosur mbi pesë ankesat e paraqitura nga subjekte politike dhe kandidatë që kontestojnë rezultatet e zgjedhjeve të 7 qershorit. Ankesat janë në shqyrtim dhe vendimet do të merren brenda afatit ligjor prej pesë ditësh nga data e pranimit. Komisioni Qendror i Zgjedhjeve (KQZ) pret këto vendime për të proceduar me certifikimin e rezultateve përfundimtare, duke theksuar se nëse nuk ka obligime për KQZ-në, certifikimi do të bëhet menjëherë. Monitoruesit e procesit zgjedhor vlerësojnë se pas përfundimit të shqyrtimit në Gjykatën Supreme, faza e mjeteve juridike përmbyllet dhe hapet rruga për konstituimin e Kuvendit të Kosovës brenda afatit 30 ditor nga certifikimi i rezultateve.