Gjykata Supreme e Kosovës ka shfuqizuar dispozitat e Rregullores së Komisionit Qendror të Zgjedhjeve që vendosnin kushte dhe kufizime të reja për akreditimin dhe veprimtarinë e vëzhguesve të zgjedhjeve. Këto dispozita tejkalonin Ligjin për Zgjedhjet e Përgjithshme dhe rrezikonin transparencën dhe llogaridhënien në procesin zgjedhor, duke lejuar vendimmarrje arbitrare dhe kufizime të padrejta ndaj organizatave dhe mediave monitoruese. Instituti Demokratik i Kosovës ka mirëpritur këtë vendim dhe i bën thirrje KQZ-së që të harmonizojë rregulloren në përputhje me ligjin, duke përfshirë konsultime publike me shoqërinë civile dhe median. Ky aktgjykim vendos një standard të rëndësishëm për administrimin e proceseve zgjedhore, duke garantuar respektimin e ligjshmërisë, sigurinë juridike dhe transparencën.