Pas largimit kolektiv të gjyqtarëve, prokurorëve dhe stafit administrativ serb nga institucionet e Kosovës në veri në fund të vitit 2022, gjykatat në këtë zonë vazhdojnë të funksionojnë me mungesa të mëdha. Ky largim u shkaktua nga vendimi i Qeverisë së Kosovës për të ndërruar targat e automjeteve serbe me ato të Kosovës, dhe u mbështet politikisht nga Lista Serbe dhe autoritetet në Beograd. Ekspertët vlerësojnë se rikthimi i këtyre zyrtarëve është thelbësor për funksionimin efikas të sistemit të drejtësisë dhe për rritjen e besimit të komunitetit serb, por ai duhet të bëhet mbi bazën e përgjegjësisë institucionale, jo marrëveshjeve politike.