Grupi për Studime Juridike dhe Politike (GLPS) ka reaguar ashpër ndaj mënyrës së zhvillimit të seancës së Kuvendit të Kosovës për zgjedhjen e Presidentit/es, duke e cilësuar atë si një shkelje flagrante të Kushtetutës. Sipas GLPS, votimi i nisur nga Lëvizja Vetëvendosje për dy kandidate u zhvillua pa praninë e kuorumit të nevojshëm prej 2/3 të deputetëve, duke e bërë procesin nul dhe të paligjshëm. GLPS paralajmëron se vazhdimi i kësaj seance në të njëjtën formë përbën një rrezik serioz për rendin demokratik dhe është një abuzim me mandatin publik, duke kërkuar ndërprerjen e menjëhershme të veprimeve të tilla. Organizata thekson se shkelja e Kushtetutës nuk mund të justifikohet me nevojën për funksionalitet institucional dhe kërkon që personat përgjegjës të mbajnë përgjegjësi publike dhe institucionale për këtë devijim nga normat kushtetuese.