Grupi për Studime Juridike dhe Politike (GLPS) ka shprehur shqetësim për vazhdimin e praktikës së mbajtjes së pozitës së Sekretarit të Përgjithshëm të Kuvendit të Kosovës me ushtrues detyre, duke theksuar se kjo dëmton stabilitetin institucional dhe profesionalizmin e administratës publike. GLPS vlerëson se shkarkimi i ushtruesit të detyrës, i cili ishte edhe kandidat fitues i konkursit, pa emërimin e tij zyrtar pas përfundimit të procesit të rekrutimit në dhjetor 2024, paraqet një praktikë shqetësuese dhe shkelje ligjore. Organizata thekson se procesi i rekrutimit është zhvilluar në përputhje me ligjin dhe nuk janë identifikuar shkelje që cenojnë meritokracinë apo ligjshmërinë, ndërsa kërkon nga Kryesia e Kuvendit që të përfundojë procedurën me emërimin e kandidatëve fitues. GLPS paralajmëron se çdo tentativë për anashkalimin e këtij procesi është e pajustifikueshme, cenon sigurinë juridike dhe të drejtat e kandidatëve, dhe kërkon mbrojtje nga politizimi i pozicioneve drejtuese në administratë.