Kryetari i Komunës së Obiliqit, Halil Thaçi, ka falënderuar asamblistët për miratimin e Kodit të Etikës për zyrtarët publikë në këtë komunë. Ai e konsideron këtë kod më shumë se një akt formal, duke e përshkruar atë si një “vijë të kuqe” për funksionimin e institucioneve lokale. Sipas Thaçit, ky dokument përcakton standarde të qarta dhe të panegociueshme që përfshijnë përgjegjësinë, transparencën dhe integritetin në ushtrimin e detyrave publike. Ai bëri thirrje që sektorët e administratës, shëndetësisë dhe arsimit të zbatojnë me përpikëri këtë kod, duke theksuar se qytetarët meritojnë shërbime të drejta dhe dinjitoze nga institucionet publike.