Kryetari i Partisë Demokratike të Kosovës, Bedri Hamza, ka pritur Ministren për Evropën dhe Punët e Jashtme të Shqipërisë, Elisa Spiropali, ku kanë diskutuar për thellimin e bashkëpunimit ndërmjet dy vendeve dhe sfidat aktuale në arenën ndërkombëtare. Hamza ka vlerësuar mbështetjen e vazhdueshme të Shqipërisë ndaj Kosovës, duke e cilësuar atë si zë të Kosovës aty ku vendi nuk ka prezencë, dhe ka shprehur gatishmërinë për ndërtimin e një agjende të përbashkët strategjike përballë sfidave kombëtare dhe ndërkombëtare. Në takim u diskutua edhe për nevojën e bashkëpunimit institucional dhe akademik për të mbrojtur të vërtetën historike të luftës çlirimtare kundër përpjekjeve për rishkrim të historisë nga Dhomat e Specializuara në Hagë. U propozua konkretizimi i bashkëpunimit përmes tryezave, konferencave ndërkombëtare dhe nismave në Këshillin e Evropës, duke theksuar përkushtimin për forcimin e marrëdhënieve Kosovë-Shqipëri në interes shtetëror dhe kombëtar.