Kryetari i PDK-së, Bedri Hamza, ka deklaruar se presidentja aktuale Vjosa Osmani nuk ka të garantuara nënshkrimet e PDK-së për të kandiduar për një mandat të dytë. Ai theksoi se për t’u bërë kandidat duhet të plotësohen kushtet formal-juridike, përfshirë sigurimin e 30 nënshkrimeve nga deputetët, dhe deri tani nuk ka asnjë kandidaturë zyrtare që i ka siguruar këto nënshkrime dhe i ka depozituar ato në Kuvend. Hamza shtoi se PDK nuk ka numrat e mjaftueshëm për të dhënë kandidatin e vet dhe se edhe nëse Osmani siguron tetë nënshkrime, ajo nuk ka të garantuara ato të PDK-së. Ai gjithashtu rikujtoi se Osmani është zgjedhur me propozim të Lëvizjes Vetëvendosje dhe mbështetjen e LDK-së, dhe deri më 28 dhjetor ka bërë veprime që i kanë shkuar në favor të LVV-së.