Ramush Haradinaj, kryetari i Aleancës për Ardhmërinë e Kosovës, mori pjesë në ceremoninë e rivarrimit të dëshmorit Agron Gjocaj në Kompleksin Memorial të Dëshmorëve në Baballoq të Deçanit. Ai e kujtoi Gjocajn si një ushtar të guximshëm dhe të përpiktë, i cili gjithmonë qëndroi në vijën e parë të frontit në Zonën e Dukagjinit dhe kontribuoi edhe në furnizimin me armatim gjatë luftës për lirinë e Kosovës. Agron Gjocaj ra dëshmor më 18 gusht në altarin e lirisë, bashkë me bashkëluftëtarët e tij Avni Bali Sinanajn dhe Milaim Rexhë Gjocajn, ndërsa trupi i tij u rivarros pranë tyre në Kompleksin Memorial. Haradinaj theksoi se lavdia dhe kujtimi për Agron Gjocajn do të mbeten të përjetshme dhe shprehu mirënjohje të thellë për sakrificën dhe shërbimin e tij ndaj atdheut.