Ambasadori britanik në Kosovë, Jonathan Hargreaves, gjatë një pritjeje të organizuar nga Ambasada Britanike me rastin e ditëlindjes së Mbretit, bëri thirrje që partitë politike të bashkëpunojnë për krijimin e institucioneve të qëndrueshme në vend. Ai theksoi se pas 18 muajsh pasigurie politike, sfidat me të cilat përballet Kosova dhe kontinenti nuk mund të presin dhe është e domosdoshme që forcat politike të punojnë së bashku për të mirën e vendit. Hargreaves rikonfirmoi mbështetjen e vazhdueshme të Mbretërisë së Bashkuar për Kosovën, duke theksuar se Londra ka qenë pranë vendit që nga fillimi dhe do të vazhdojë ta mbështesë edhe në të ardhmen. Ai vlerësoi përparimin e Kosovës si rezultat të vendosmërisë dhe guximit të qytetarëve dhe nënvizoi rëndësinë e forcimit të demokracisë, shtetit të së drejtës dhe karakterit shumë-etnik të shtetit për të ndërtuar besim te partnerët ndërkombëtarë.