Enver Hasani, ish-kryetari i Gjykatës Kushtetuese të Kosovës, ka deklaruar se dekreti i presidentes Vjosa Osmani për shpërndarjen e Kuvendit dhe dërgimin e vendit në zgjedhje të reja është jokushtetues dhe përbën një përpjekje të rëndë për përmbysje të rendit kushtetues. Ai thekson se shkelja e afatit tridhjetëditor për zgjedhjen e presidentit nuk prodhon pasojë juridike dhe nuk mund të justifikojë shpërndarjen e Kuvendit pa pajtimin e të gjitha partive politike. Sipas Hasanit, me këtë vendim po tenton të ndryshohet forma e pushtetit nga sistemi parlamentar në atë presidencial, gjë që mund të bëhet vetëm përmes një amendamenti kushtetues. Ai kërkon që Gjykata Kushtetuese të ndërhyjë urgjentisht dhe të vendosë masa të përkohshme për të parandaluar erozionin e mëtejshëm të rendit kushtetues dhe paralajmëron kontestim të dekretit nga Lëvizja Vetëvendosje në Gjykatën Kushtetuese.