Ish-presidenti i Kosovës, Hashim Thaçi, në një intervistë nga Haga, ka folur për besimin e disa shqiptarëve në një “Jugosllavi të reformuar” edhe kur shpërbërja e saj ishte e pashmangshme. Ai e krahasoi këtë shpresë me situatën në fillim të shekullit XX, kur shqiptarët ende besonin në Perandorinë Osmane që po shpërbëhej. Thaçi përmendi gjithashtu periudhën pas rrëzimit të Murit të Berlinit, ku disa grupe shqiptare protestonin kundër bashkimit të Gjermanive, duke theksuar ndarjet ideologjike që penguan lëvizjen për pavarësinë e Kosovës. Sipas tij, me kalimin e kohës dhe përhapjen e standardeve demokratike, këto rryma u larguan nga skena politike përmes votës së lirë.