Deputeti Haxhi Avdyli, i vetmi nga Partia Guxo që mbështet presidenten Vjosa Osmani, ka refuzuar kategorikisht mundësinë e rikthimit në Lidhjen Demokratike të Kosovës (LDK). Ai njoftoi se do të vazhdojë të jetë pjesë e grupit parlamentar të Lëvizjes Vetëvendosje, pavarësisht dorëheqjes nga pozitat në Guxo. Kjo deklaratë erdhi pak orë pasi kryetari i LDK-së, Lumir Abdixhiku, bëri thirrje për bashkim brenda spektrit politik, duke ftuar presidenten Osmani dhe ish-anëtarët e LDK-së që të rikthehen dhe të bashkohen në një projekt të përbashkët politik. Abdixhiku theksoi nevojën për tejkalimin e ndarjeve dhe mosmarrëveshjeve të së kaluarës, duke e quajtur LDK-në shtëpinë e përbashkët të mbështetësve të Republikës dhe rrugës euroatlantike.