Kryetarja e Kuvendit të Kosovës, Albulena Haxhiu, ka pritur në takim ambasadorin e Italisë në Kosovë, Maurizio Antonini, ku u diskutuan marrëdhëniet e mira ndërmjet dy vendeve dhe situata aktuale politike në vend, me fokus të veçantë në funksionimin e Kuvendit. Haxhiu vlerësoi mbështetjen e vazhdueshme të Italisë, duke theksuar se Italia qëndron pranë Kosovës dhe qytetarëve të saj në çdo fazë të zhvillimit. Ajo gjithashtu nënvizoi ecurinë pozitive në punën e Kuvendit dhe rritjen e angazhimit për realizimin e agjendës së punës parlamentare. Të dyja palët riafirmuan përkushtimin për bashkëpunim të mëtejshëm dhe fuqizim të partneritetit mes dy vendeve, duke përfshirë zgjerimin e kontakteve dhe shkëmbimeve në nivel parlamentar.