Ushtruesja e detyrës së presidentit të Kosovës, Albulena Haxhiu, ka pritur në takim Drejtoreshën Ekzekutive të Qendrës Kosovare për Rehabilitimin e të Mbijetuarve të Torturës, Feride Rushiti. Gjatë takimit, Haxhiu ka shprehur falënderimet për angazhimin e palodhshëm të Rushitit në mbështetje të të mbijetuarve të dhunës seksuale gjatë luftës dhe ka garantuar mbështetjen e plotë institucionale për avancimin e të drejtave, dinjitetit dhe mirëqenies së tyre. Ajo ka theksuar rëndësinë e këtij misioni jo vetëm për të mbijetuarit dhe shoqërinë, por edhe për forcimin e drejtësisë dhe dinjitetit në shtetin e Kosovës. Haxhiu ka siguruar se do të vazhdojë të mbështesë çdo përpjekje për të përmirësuar kushtet dhe mbrojtjen e të mbijetuarve të dhunës seksuale gjatë luftës.