Kryetarja e Kuvendit të Kosovës, Albulena Haxhiu, ka kujtuar 37 vjetorin e grevës së minatorëve të Trepçës, duke e cilësuar atë si një prej kapitujve më të fuqishëm të historisë së vendit. Ajo theksoi se greva nuk ishte vetëm një akt sindikal, por një kushtrim qytetar dhe kombëtar, që shënoi një pikë kthese historike duke paralajmëruar fundin e një sistemi shtypës dhe duke forcuar themelet për rrugëtimin drejt Republikës. Haxhiu nënvizoi se kujtimi i kësaj ngjarjeje është një ripërtëritje e zotimit për mbrojtjen dhe fuqizimin e shtetit çdo ditë. Në kuadër të Ditës Botërore të Drejtësisë Sociale, ajo nderoi të gjithë ata që punojnë për drejtësi, luftojnë kundër varfërisë, pabarazisë gjinore dhe papunësisë, si dhe angazhohen për mbrojtjen e të drejtave të njeriut.