Ministri në detyrë i Infrastrukturës dhe Transportit të Kosovës, Dimal Basha, zhvilloi një takim me homologun e tij shqiptar, Enea Karakaçi, ku diskutuan për projektin strategjik të hekurudhës Durrës–Prishtinë. Të dy ministrat shprehën përkushtimin e tyre për realizimin e këtij projekti, duke theksuar sfidat dhe kostot që ai kërkon, por edhe rëndësinë e tij për zhvillimin ekonomik dhe lidhjen kombëtare. Kjo linjë hekurudhore pritet të shërbejë si një korridor i ri zhvillimi për tërë Evropën Juglindore, duke lehtësuar lëvizjen e qytetarëve dhe mallrave ndërmjet dy vendeve. Projekti konsiderohet një investim i përbashkët që do të sjellë përfitime afatgjata për të dy shtetet dhe brezat që do të vijnë.