Kryeprokurori i Prokurorisë Themelore në Prizren, Petrit Kryeziu, ka deklaruar se hetimet për manipulimet me votat në zgjedhjet e 28 dhjetorit po vazhdojnë intensivisht. Ai theksoi se Prizreni është një nga rastet më të mëdha me keqpërdorime, ku janë evidentuar mbi 68 mijë vota të manipuluara dhe janë arrestuar 109 persona. Gjatë periudhës së paraburgimit janë siguruar prova të shumta, përfshirë dëshmi bashkëpunuese, dhe janë zbuluar edhe raste të tjera të keqpërdorimeve si dhënie e marrje ryshfeti dhe kanosje. Kryeziu paralajmëroi se pas përfundimit të hetimeve do të ngrihen aktakuza, duke përfshirë edhe dënime plotësuese për mos-ushtrimin e funksioneve publike ndaj të dyshuarve, ndërsa hetimet po zhvillohen edhe në Suharekë, Dragash dhe Mamusha.