Kryetari i komunës së Istogut, Ilir Ferati, së bashku me strukturat e degës së LDK-së dhe familjarë, kanë bërë homazhe për të nderuar jetën dhe veprën e ish-kryetarit të komunës së Istogut dhe nënkryetarit të LDK-së, Haki Rugova, në 4-vjetorin e vdekjes së tij. Në njoftimin e LDK-së, Haki Rugova është kujtuar si një personalitet dhe veprimtar i dalluar, shembull i përkushtimit dhe kontributit të jashtëzakonshëm në shtetndërtimin e Kosovës. Angazhimi i tij i pandalshëm në proceset e vështira të vendit dhe qëndrimi i palëkundur për më shumë se tre dekada në veprimtarinë atdhetare e politike e bëjnë atë një model të njeriut të urtë, punëtor, afër dhe bashkëpunues. Kujtimi për Haki Rugovën mbetet i përjetshëm dhe i nderuar nga LDK-ja dhe komuniteti i Istogut.